لو كان عوج
03/05/2008
عتاوية من غير فريج
قبل كل شي سمحوا لي هالمرة أكتب بالعامية لأن الموضوع ما يستحمل ثقافة وفصحى.
مرة قلت لأمي: أهلك مستهترين ومغرورين. قالت: مالك إلا خشمك لو كان عوج!. ومرة قلت لأبوي: أهلك معقدين ومتخلفين. قال لي: مالك إلا خشمك لو كان عوج!. ومرة كنت أسولف مع بنت الجيران فقلت: أهل الديرة شكاكين وحسودين ومتخلفين ويبيلهم غسيل مخ. قالت لي: مالك إلا خشمك لو كان عوج!. وسمعت إن واحد زوج بنته من ولد عمها الفاسد المكسر اللي طايح حظه (عذرا للكلمات) لأن محد يصبر عليه إلا بنت عمه وهي مالها إلا خشمها لو كان عوج!. ومرة اخوي وداني مشوار بسيارته وقام يلفلف بين البيوت من سكة لسكة ويوم قلت له: ليش ما راحت من الطريق العام السيدا. قال انه بين البيوت ما في اشارات وأسرع رغم إن الطرق بين البيوت مكسرة وفيها مطبات وعيال بس مالنا إلا خشمنا لو كان عوج!.
من كثر ما أسمع هالكلمة تمنيت إن الانسان ما عنده خشم بس حتى لو ما عنده هم بيقولون مالك إلا (....) لو كان عوج!.
مؤخرا اكتشفت اكتشاف خطير ما اظنه يفيد البشريه بس بالنسبة لفقيرة الله اكتشاف. اكتشفت ليش احنا ما نحب الشي السيدا،لأن سيدا كلمة هندية والهنود خدمنا وسواويقنا ومو معقولة احنا اللي نسخر منهم نستخدم كلامهم. وبعد السيدا في مادري أي لغة معناها الأيدز واحنا أمة تخاف الله وتخاف من المرض فكرهنا هالكلمة. وإذا قلنا مستقيم اكتشفنا ان العجم (أهل إيران) يقولونها واحنا مو ذاك الزود وياهم وهما بعد ما يشتهونا فخلينا عوجان أحسن وصدق الجميع وخبت آنا،مالي إلا خشمي لو كان عوج!.
ليست هناك تعليقات:
إرسال تعليق