يا رب كيف يصفق اللي ماعنده كفوف ...
12/09/2008
عتاوية من غير فريج
لما كنت صغيرة
شفت واحد ما عنده كفوف
طاحت دموعي عليه
دموع طفلة
قلت يا ربي كيف يصفق اللي ماعنده كفوف
*
لما كنت صغيرة
شفت انسان مكفوف
طاحت دموعي عليه
مسكين يا ماما
يعني حتى باباي ما يقدر يشوف
*
لما كنت صغيرة
شفت يتيم لحاله عزوف
طاحت دموعي عليه
دموع طفلة
قلت يا ربي مين يشيله فوق الكتوف
*
ولما كنت صغيره
شفت ميت بالكفن ملفوف
طاحت دموعي عليه
مسكين يا ماما
طاح من السما مثل توم الملقوف
* * *
كانت الدنيا بعيني غير
كل أفكاري اذا كبرت
حدها شبر من عيني
يا شينها عيني ما تشوف
* * *
وكبرت
وعلمتني الدنيا
شي ما تعلمته بالمدارس والصفوف
كل اللي شفتهم وانا صغيرة
بكوا على دمعتي
دمعة طفلة
دمعة مكسور خاطر
دمعة انسان ع الخير ملهوف
* * *
و لما كبرت قلت يا ربي
الحين ما كان همي الا
شلون يصفق
وباباي
ولعبة فوق الكتوف
وصرت أفكر بكل الناس
كلن عايش
وافكاري صارت كبر الفضا
صرت احلل واناقش وأدور
وينكسر خاطري عليهم
من دون دمعة
هم مثلي ومثل أمي
ومثل باباي
أقوياء
أقوياء جدا
ليش ثقافة الدمعة عند الطفل
ليش يا رب
على كل شي يبكي ذاك الطفل
وكبرت كثير بعدها
وأمس شفت مكفوف
وشفت يتيم
وشفت مقطوع الكفوف
وبكيت
واكتشفت
إني أنا هي أنا
وإن كلكم هو أنا
كلنا شخص عطوف
تهاني
ليست هناك تعليقات:
إرسال تعليق